iwkwlfua

nice6boyt7

Respect is something that people does earn. It don’t come just suh. People does got to wuk for it. But some does try fuh buy it. That is wha does happen when dem tun Minister of de Government.  Sam and Bheri is two people who ain’t got respect fuh people, though. Dem disrespect two reporter.Sam watch a reporter full in he face and tell he that he can’t remember something he sign. That was couple month ago. This time he tun round and tell a reporter that Amaila is Guyana flagship project. He forget that some people did disrespect he when dem give he kero in coconut water.Bheri is de other one. Because a reporter tell he how he collecting he share of de thiefing money he tell de reporter how is a good thing dem got a free press. Dem boys seh that he get de fat talk from Jagdeo. He get nuff things from Jagdeo including all he bad habits.Imagine he know bout de hydroclave and he keep he mouth shut because he spot a runnings. That is why he use to deh in de hospital compound so much.That mek de Waterfalls boss man get vex. He seh that Uncle Donald know why he walk wid only women to Colombia. Obama security men decide to pick fares in Colombia. Dem get ketch and dem get send home. Obama end up wondering wha woulda happen if he did keep that set and sleep. He coulda get kidnap.Nuff of dem Minister in Uncle Donald Cabinet like pick fare. That is why dem does thief so much. Dem need de money. If Uncle Donald did only carry dem to Colombia is he alone woulda deh attending de Summit of de Americas. And de treasury woulda empty. And is a good thing that Jagdeo is not de president attending de summit because nobody from Guyana woulda attend dem session. Dem boys seh suh.Uncle Donald got to depend pun de Colombian security suh right now he don’t have problem. In any case, if he security was big and dem woulda pick fare he couldn’t afford to fly dem back to Guyana and bring a next set.Good things does happen to Guyana.Talk half and don’t disrespect de other half