tek control of de Cabinet meeting

micevan1l6

Power is not something that people does give up easy. Dem boys know people who use to be police and walk pun de road and holler pun people. When de man retire he still go to de station every day and tek up chair.Jagdeo was president and when he stop being president it was hard fuh he tek a back seat. He use to go and sit down in Ohh Pee. One time when Donald had to go out, he Jagdeo, tek control of de Cabinet meeting, and dem boys talk.Power suh sweet that de man does tun up at Ohh Pee any time and every time, because he like de salute he does get at de gate from dem sentry. He does also enjoy calling all dem government people and giving dem instructions.Well after a while when people start fuh point dem finger at he and calling he and he friends scamps and crooks, he tek a back seat. He start fuh come out in de night like Dracula wid a black hat.However, is elections time and Rohee let out de big announcement. He tell dem boys that Jagdeo approach he and offer to do anything fuh get a chance fuh talk pun de platform. He seh that he had to ask Donald, who then tun and seh that he had to ask Jagdeo.Now Jagdeo got a plan fuh dem. He hear that Sam ain’t going back as Prime Minister, suh he decide that he gun be de Prime Minister. He plan fuh do a Putin. He gun be de richest Prime Minister in de region. And wha getting de ordinary man vex is that he gun get another salary pun top of what he getting already.He getting nearly $3 million as pension and allowance; he getting money from de climate change people and now he want to collect another $2 million as Prime Minister. That is greed; that is de power. And Rohee proud fuh announce it.Talk half and watch how Jagdeo reaching fuh power.